लाव्हा

18:58

का होत नाही धरणीकंप
का स्फुटत नाही ज्वालामुखी

का येत नाही त्सुनामी
घ्याया कवेत अवनी

कुठला खदखदतोय लाव्हा
कोणता जळतोय हा सूर्य

कोण तटतटतोय पान्हा
कोणता लुचाया कान्हा

जन्माया हा धडपडे गर्भ
वांझ कळांची त्याला साथ

काही केल्या सुटेना नाळेचा फास
काही केल्या तुटेना उदराचे पाश

धरणी कधी फुटणार नाही
लाव्हा गरळ ओकणार नाही
पान्हा कधी झरणार नाही
सल कुठला तो सरणार नाही