नरसमता

चारदोन लाथा खाऊन
शरीराचं फ़ार काही बिघडत नाही
आसवं पूर्ण आटवून टाकून
मनाचं काय होतं
कल्पना आहे का तुम्हाला

ताकदवान असणं
सुखावह असतंच असं नाही
ताकदीचंच मोठ्ठ ओझ असतं
वेताळासारखं सतत मानगुटीवर
मरेपर्यंत तिथेच

रडतोस काय मुलीसारखा
लाजतोस काय बाईसारखा
घाबरतोस काय शेळपट
मान कशी ताठ पाहिजे
डोळ्यांत सारखी जरब पाहिजे

कोणासम कोणी व्हावं
तुम्हीच पहा
मैदानातला दगड बरा की
कैदेतली स्वच्छंदी बरी
तुम्हीच ठरवा